Лаеш районы Бима бистәсендә яшәүче Елена Фирсова бакчасында гигант кабак үстергән. Без әңгәмә алган көнне кабакның авырлыгы 152 килограммга кадәр җиткән иде. Көннәр җылы торганлыктан, ул үсүен дәвам итә. Көненә якынча 1-5 килограммга кадәр үлчәмдә арта ала икән. Мондый гигант кабакның орлыгын бакчачы каян кайтарткан? Кабактан ниләр эшләргә җыеналар? Барысын да аның үзеннән сораштык.
— Гигант кабак менә шулай зур булып өч ай эчендә үсте, — дип сүз башлады Елена апа. — Бернинди химиясез үстердем. Кабак орлыгын конкурста җиңеп, Мәскәүдән кайтарттым. Орлыкның исеме — “Atlantic Giant”, үземчә аны “Йолдызкай” дип йөртәм. Социаль челтәрдә кабак үстерүчеләрнең махсус төркеме бар. Шунда аралашып, киңәшләшеп эшлибез. Кабак җылы һәм якты ярата. Әмма турыдан-туры кояш нурлары зыян да китерә ала. Узган ел да кабак үстердем — 120 килограммга җитте. Быел күпме булыр, анысын озакламый белербез. Мин утырткан орлыктан 200, 400, 500 һәм хәтта кабакның “әти-әниләре” 700 килограммга кадәр дә җитә ала. Бу шундый гигант сорт.
— Кабакны ничек үлчи алдыгыз?
— Өйдә мондый зур әйберләрне үлчәргә үлчәвем дә юк. Гади рулетка белән иңен-буен тапкырлап белдем. Үлчәү булган очракта да бу кадәр авыр кабакны ничек күтәреп салмак кирәк!
— Кабак уңышын нишләтергә уйлыйсыз?
— Бернинди химиясез үскән кабак булгач, аны курыкмыйча ашарга ярый. Гаилә белән уйлаштык та, кабак үсүдән туктагач, аннан сок ясарбыз, дидек. Якынча 150 литр сок чыгарга тиеш.
— Мондый уңыш белән берәр бәйгедә катнашырга уйламыйсызмы?
— Кабак үстерүчеләр арасында оештырылучы “КабакБатл-Агрорекорд-2024” конкурсында катнашам. Минем өчен беренче чиратта җиңү түгел. Тизрәк бакчамдагы рекордымны беләсем килә. Бу шөгыль шундый мавыктыргыч. Көн саен, иртән торуга, кабак янына йөгерәм. Ул күз алдында көнләп түгел, сәгатьләп үсә.
Елена Фирсова бакчасында гигант кабак кына түгел, гигант карбыз да үстергән. Аның авырлыгы 40 килограммга кадәр җиткән. Җир эшен кечкенәдән ярата ул. Бакчасында үскән борычларның авырлыгы да берсе-берсе 300-350 грамм.
Елена апа кышкы озын кичләрдә дә күңелсезләнми. Аның кышкы бакчасы махсус лампалар белән җиһазландырылган. Декабрь-февраль айларында аның кыяры, помидоры, редисы һәм хәтта карбызы да үсеп утыра.
Арыслан ГӘРӘЕВ.
