Ютазы районы Байлар авылында яшәүче балта остасы Зилфәр Гәрәйшинның даны күрше-тирә районнарга да таралган. Аның кул эшләрен аеруча балалар ярата. Чөнки ул аларның барлык теләкләрен истә тотып, берсеннән-берсе матур, мавыктыргыч уенчыклар ясый. Өлкән буын өстәл, урындык, ял итү өчен беседкалар сорап мөрәҗәгать итә икән.
— Агач эшенә осталык бабам Мөслимнән күчкән, — дип әңгәмәбезне башлады Зилфәр абый. — Алтын куллы кеше иде ул. Балачакта аның янында кайнашып, ярдәм итеп үстем. 25 ел элек гаиләбез белән өй салырга керештек. Шул вакытта такта эшкәртә торган станок кирәк иде. Тиз генә аны юнәтү ягын карадым. Нәтиҗәдә йортны шул станок белән салып та бетердек. Соңрак тәрәзә рамнары, ишекләр ясый башладым. Күрше-тирә, танышлар да ярдәм сорап, өйләренә чакырды.
Материал өчен нарат агачын сайларга тырышам. Аны башта яхшылап киптерәм. Чөнки эш башлаганда ул тулысынча коры булырга тиеш.
Соңгы елларда күбрәк балалар бакчаларыннан заказлар килә: өйләр, беседка, паровоз, машиналар, өстәл, комлыкта уйный торган корылмалар сорыйлар. Урыссу балалар иҗат үзәге өчен дә шактый уенчыклар ясадым. Тәрбиячеләр, сабыйларның шатлыклы йөзләрен күреп, кат-кат рәхмәт әйтеп шалтыраталар.
— Кул эшләрегез берсеннән-берсе соклангыч.
— Идеяләр төрлечә килә. Махсус үзем уйлап ясаган әйберләрем дә бар. Күпчелек ул балалар бакчасына яки балалар иҗат үзәге өчен уен форматында эшләнә. Интернет челтәрендә дә такта эшләре белән бәйле эскизлар бик күп. Кайвакыт яртысын шуннан алам, калганын үземчә башкарам. Минем өчен хатынымның бәяләмәсе аеруча мөһим. Әлфинур әйткәннәрне һәрчак истә тотарга тырышам. Бергәләшеп баш ватканда гына матур эшләнмәләр килеп чыга. Остаханәмдә рәхәтләнеп ял итәм, көч-дәрман туплыйм.
Зилфәр Гәрәйшин “Баулы нефть” оешмасында насос станциясе машинисты булып эшли. Улы Эльнар да әтисе юлын сайлаган. Оныклары Наилә белән Самат дәү әтисенең остаханәсендә еш кунак була. Чөнки күпчелек уенчыклар нәкъ менә аларга атап эшләнә.
Арыслан ГӘРӘЕВ.
