Мамадыш районыннан Регина һәм Руслан Гәрәевлар аквариум балыклары үрчетү белән шөгыльләнә. Моннан дүрт ел элек алты балыктан башлаган булганнар, хәзер аларның саны меңнән арткан.
— Бу эшкә уйламаганда тотындык. Ирем: “Әйдә, аквариум, балыклар алыйк әле”, — диде. Беренче аквариум 15 литрлы иде. Аны үзебезчә бизәп, иң гади саналган гуппи, пецилия һәм кылыч балыклар җибәрдек, — дип искә ала Регина.
Белгечлеге буенча ул аш-су остасы, ире — трактор йөртүче. Балыклар үрчетеп карамаган гаиләгә бу эш башта катлаулырак тоела. Күп нәрсәне интернеттан карап өйрәнәләр.
— Берсендә аквариумда бер балык маймыч чыгара башлады. Ярый интернет бар. Ирем барысын да укыды, шуннан соң балык үрчетү белән кызыксына башлады, — ди Регина.
Алар бик күп балык төрләрен сынап караганнан соң, үзләренә ошаган, чыдамлыларына тукталганнар. Хәзер 40 ка якын аквариумнары бар. Кайсы — 70, ә кайберләре 500 литрлы. 45 төргә якын балык тоталар, 20 төрен үрчетәләр.
— Балыклар белән кызыксынучылар күп. Бу өлкәдә аларга белгәннәребезне өйрәтә алуыбызга сөенәбез. Балыкларны сатабыз. Әмма бу кәсеп түгел, аның акчасы да бик юк, балык үрчетү — беренче чиратта күңелгә рәхәтлек бирә торган шөгыль. Аквариумда йөзгән балыкларга озак карап торсаң, тынычланасың. Балыкларны балаларыбыз да күзәтергә бик ярата, — ди Гәрәевлар.
Балык үрчетә башларга теләгән кешеләргә артык тәрбия таләп итми торган гади төрләрдән башларга киңәш итәләр. Гуппи — иң билгеле, тиз үрчи торган аквариум балыгы. Аның койрыклары һәм канатлары матур төстә. Кылыч балык (меч-рыба) тыныч булуы белән аерылып тора. Алар бөтен нәрсәне ашый. Теләсә кайсы балык белән дуслаша. Коридорасның авызы астарак урнашкан. Бу аңа суның төбеннән ризыкны ашарга ярдәм итә. Гурамилар зәңгәрсу, сары төстә, таплы булалар. Алар яктылык ярата. Кардиналлар да матур, ачык төстә. Су температурасындагы кискен үзгәрешләрне җиңел кичерәләр.
— Һәр балык матур һәм үзенчәлекле. Теләге булган кеше үзенә ошаган төрне сайлый ала, — ди Регина.
Балыкларны дөрес тәрбияләү дә мөһим.
— Төп кагыйдә: аквариумда су чиста булырга тиеш. Аны вакытында алыштырып торырга кирәк. Суның кислород белән тәэмин ителүе, фильтрлаштырылган булуы мөһим. Балыкларга сыйфатлы азык кына ашатабыз. Махсус ризыкларыннан тыш күбәләк (мотыль), циклоп, артемия сыман кабырчык төрләре һәм башка тәмле азыклар белән сыйлыйбыз, — ди Регина.
Аквариум балыклары ике төрле юл белән үрчи икән.
— Гуппи кебек балыклар маймыч чыгара, ә барбус, тернеция, анциструс, гурами, кардинал, коридорас уылдык чәчә. Иң катлаулысы — уылдык чәчү чоры. Нәселне саклап калу өчен бу процессны җентекләп күзәтергә, игътибарлы булырга кирәк, — ди Регина.
Балыктан тыш Гәрәевлар әкәм-төкәм, әрләннәр дә үрчетә. Киләчәктә кенәри, тутый кошлар алырга уйлыйлар.
Эльвира МОЗАФФАРОВА.
