Озын кыштан соң май ялларын көтеп алабыз. Май ае ял, хезмәт белән бергә үрелеп бара. Табигать уянганнан соң күпләр бакча эшенә керешә. Күркәм гадәт буенча, өйләр юу, ишегалларын тәртипкә китерү, урам белән өмәләр уздыру башлана. Ә кичләрен учакта тәмле ризыклар пешә, самавыр кайный, су буеннан бака тавышлары ишетелә. Газета укучыларыбыздан да Яз һәм Хезмәт бәйрәменә нинди планнар корулары турында сораштык.
“Табигатьтә эшләү ялга тиң”
Фернат НАСЫЙБУЛЛИН, Кариев театры артисты:
— Туган ягым Яшел Үзән районы Норлат авылында элек бәрәңге бакчасын көрәк белән казыйлар иде. Бездә уңдырышлы кара җир. Казырга да әллә ни авыр булмады. Һава торышы матур торса, эшләргә рәхәт. Табигать яшәрә, кошлар сайрый. Бу күренеш бер могҗизага тиң. Табигатькә чыгып эшләүне ялга саныйм. Бәйрәмнәрдә театрда спектакль булмаса, Лаеш районындагы бакчага чабабыз. Хатынымның туган ягы Балтач районына да кайтырга тырышабыз. Ике якта да әниләребез исән-сау. Күршеләрнең шашлык кыздырганын күрсәк, без дә читтә калмыйбыз. Эшләп арыгач, карлыган кайнатмасы белән тәмле чәй эчәргә яратам.
“Ялда эштә без”
Алмаз РӘХИМОВ, җырчы, баянчы:
— Бәйрәм көннәрендә, гадәттә, эшлибез. Арасында бер көн ял да күренә, әгәр ул көн буш калса, аны, һичшиксез, гаиләм белән үткәрәчәкмен. Бәлки, Арча районы Түбән Аты авылына кайтып килербез. Бакчаны да барып җыештырасы бар иде. Һава торышы яхшы булса, күз күрер инде.
“Өй юа торган бәйрәм”
Ләлә РӘХИМОВА, “ТНВ” каналында “Татарстан хәбәрләре” тапшыруы режиссеры ярдәмчесе:
— 1 май бәйрәменә туган якка — Мари Иле республикасы Морки районы Татар Чодраялы авылына кайтабыз. 1 май — өй юа торган бәйрәм. Безнең авылда аны йомырка бәйрәме дип тә йөртәләр. Бала-чага күкәй җыеп, тау башына чыгып ашый, уйныйлар. Кич мунча кереп, шашлык кыздырып, эскәмиядә утыру иң рәхәте.
“Йомырка җыялар”
Ләйлә МОСТАФИНА, Зәй шәһәренең “Алтынчәч” балалар бакчасы мөдире:
— 1 майда гаилә белән авылга кайтабыз. Мин Теләче районы Төрек-Тәмте авылыннан. Безнең якта 1 майны күкәй бәйрәме дип йөртәләр, чөнки бу көнне балалар йорттан йортка йөреп, буялган йомырка, тәмле ризыклар җыя. Авыл кешесе бу бәйрәмне көтеп ала, балаларның төркем-төркем йөрүен бик яратам. Кечкенә чакта шулай йөри идек, хәзер безнең балалар, оныклар шул юлны дәвам итә. Хезмәт бәйрәме булгач, эш тә гөрли: өй юабыз, бакчада эшлибез. Әни миннән түтәлләр ясата, чөнки аларны матур, тигез итеп эшлим. Егетләр төзелеш эшләрен башкара. Шулай ук төрле тәмле ризыклар пешереп ашыйбыз. Ит, балык, гөмбәдән шашлык ясыйбыз.
“Өмә ясыйбыз”
Раил ШӘМСЕТДИНОВ, Казан энергетика көллияте укытучысы:
— 1 май бәйрәмендә Лаеш районы Имәнкискә авылына ашкынып кайтам. Яз матур килсә, бәрәңге утыртабыз, авылда өмәләр уздырабыз. Әни гомер буе пешекче булып эшләде. Шуңа ул безне дүрт көн буе табын тутырып тәмле ризыклар белән сыйлый. Вакыт калса, балыкка да барам. Кыштан соң май кояшы аеруча кадерле. Арканы да кыздырган чаклар булгалый. Аннары туганнар янына барып, аларны бәйрәм белән котлап кайтабыз. Кыскасы, бер генә минутны да бушка сарыф иткәнебез юк.
“Умарталыкка менеп төшәбез”
Гәүһәрия ВӘЛИУЛЛИНА, Лаеш районының “Ак калфак” оешмасы җитәкчесе:
— 1 май бәйрәмнәре тирән хатирәләр булып күңелгә сеңеп калган. Мәктәп елларында сыйныф белән урманга бара идек. Барыбызда да пешкән йомырка, кара ипи. Кайвакыт кибеттән 21 тиенлек 3 катлы вафли алып, бүлешеп ашый идек. Лаеш районы Кече Елга авылы табигатьнең бик матур урынында урнашкан. Урман, сулыклар күп. Җикәнне урманына менеп, күмердә бәрәңге пешереп ашаулар, Полянка су буенда балык тотулар әкият кенә хәзер. Үсә төшкәч, май яллары безнең өчен авылда туганнар, дуслар белән өй юу бәйрәменә әйләнеп китте. Күрше-тирә белән бер-беребезнең өйләрен юа идек. Арып-талып өчәр көн өй юсак та, безнең өчен бер зур бәйрәмгә тиң иде. Әниләр ашарга пешерә, эш беткәч, мунча керәбез. Кичен шул ук команда белән авыл мәдәният йортына чыгып китәбез. Хәзер май бәйрәмендә күпләр бакча эшен башкара. Бәйрәмгә кадәр бакчаны бер кат чистартып чыгарабыз. Җәвитем белән умарталыкка менеп, шашлык кыздырып, чәй эчеп кайтабыз. Беренче умырзая, миләүшә чәчәкләрен җыеп, ял итү зур энергия бирә. Кошлар сайравы, җилле көнне урман шаулавы да минем өчен бер рәхәтлек бирә. Шушы рәхәтлекләрне хәзер яшьләр аңламый шул. Аларга кафе, ролл, пицца кирәк.
“Бакча эше көтә”
Гөлшат ГЫЙЛӘҖИЕВА, Казан, үзмәшгуль:
— 1 май бәйрәмнәрендә һәр елны Саба районы Бигәнәй авылында булабыз. Ирем белән икебез дә шул авылдан. Гадәттә, бу яллар өй юып, бакча эшләрен башлап, өй яны территориясен җыештырып уза. Эшне бетергәч, мунча кереп, әниләребез пешергән тәмле ризыклар белән сыйланудан да күңеллесе юк.
“Кунаклар киләчәк”
Рөстәм ХӨСНУЛЛИН, Чистай, “Камлит” заводында кәрәзле модельләр ясаучы:
— 1 майга Казаннан улыбыз Ленар һәм кызыбыз Ләйсән кайтырга тиеш. Әнине дә кичкә таба кунакка алып килергә ниятләдек. Иң якын, иң кадерле кешеләрең белән бергәләшеп алдагы айларга планнар корып, шатлыклы яңалыклар белән бүлешеп, бәйрәм өстәле янында утыру — бер бәхет!
Арыслан ГӘРӘЕВ сораштырды.
