Тиздән җәйге каникул башлана. Чыгарылыш сыйныф укучылары имтиханнарга әзерлек, укырга керү мәшәкатьләре белән мәшгуль булса, кечерәкләре рәхәтләнеп ял итә, кайсы авылга дәү әтисе белән дәү әнисе янына кунакка кайта, ә кайберләре җәйге лагерьларга бара.
Шәһәрдән башка барыр урыны булмаганнарга җәйге лагерьлар ял итәр өчен уңайлы урын инде. Биредә ял да итәсең, файдалы мәгълүмат та үзләштерәсең. Күбесендә экскурсияләр оештырыла, иҗадый һәм спорт чаралары үткәрелә.
Быел республикада 172 мең бала һәм яшүсмер җәйге лагерьларда ял итәр дип көтелә. Бәяләргә килгәндә, сменаның озынлыгына, урынына карап, лагерьга юллама 15 мең сумнан 36 мең сумга кадәр. Ә Кара диңгез яры буенда ял итү уртача 40 мең сумга төшәчәк. 40 мең путевка бюджет хисабыннан бушлай каралган.
— Авыр тормыш шартларындагы гаиләдә яшәүче балаларга — 11 мең, дәвалануга мохтаҗ булганнарга шифаханә оешмаларына — 5 мең, чакырылышка әзерли торган чатырлы лагерьларда ял итүчеләргә — 3 мең, физик яктан мөмкинлекләре чикле балалар өчен — 1,5 мең, хезмәт һәм ял лагерьларына барырга җыенучыларга — 11 мең, төрле бәйгеләрдә, олимпиадаларда җиңү яулаган сәләтле балалар өчен 8 меңнән артык бушлай юллама каралган. Шулай ук 14-17 яшьлек үсмерләр Биектау һәм Тәтеш районнарында урнашкан “Чайка” лагерьларында федераль проект кысаларында аерым квота нигезендә бюджет хисабына ял итә алачак. Әтиләре мобилизацияләнгән 2605 баланың ялын оештыру белән дә мәшгульбез, — ди Татарстанның яшьләр эшләре һәм спорт министры Ринат Садыйков.
Юлламаларны юнәтер өчен, лагерьны оештыру үзәкләренә мөрәҗәгать итәргә кирәк. Бу хактагы мәгълүмат ял итү үзәкләренең сайтларында күрсәтелгән була. Муниципаль лагерьларга юллама элек Казан шәһәрендәге “Ял” үзәге аша электрон формада башкарыла иде. Бу системаның гаделсез булуына зарланып, шикаятьләр күп килгән. Моңа кадәр юлламаны кем өлгерә, шул алып калса, хәзер конкурс нигезендә сайлаулар булачак. Лагерьга барырга лаек балаларны мәктәпләр хәл итәчәк. Талантлы, укуда уңышларга ирешкән, мәктәп, район, шәһәрнең иҗтимагый, спорт, иҗат тормышында актив катнашучыларга өстенлек биреләчәк.
Татарстанда 2019 елдан бирле “Балаларга — җәй” капиталь ремонт программасы гамәлдә. Быел исә республиканың 12 районында 14 объектта ремонт планлаштырыла. Краснодар краендагы бер лагерьны да төзекләндерәчәкләр. 2019-2023 ел эчендә 5,6 миллиард сумга барлыгы 29 балалар сәламәтләндерү лагере яңартылган.
“Нелагерь” үзәге (nelager.com):
— Бездә 7-17 яшькәчә балалар һәм үсмерләр ял итә. 10 га якын смена үзенчәлекле, гадәти булмаган тематикага багышланган булуы белән аерылып тора. Әйтик, кулинариягә багышланганында балалар ашарга пешерергә өйрәнә, хәтта ресторан ризыгын да әзерлиләр, “Форд Боярд” сменасы да уен формасында мавыктыргыч уза. Кыскасы, бездә балалар телефонда утырмый. Лагерьлар Мамадыш, Болгар, Боровое Матюшино, Анапада уза. Юлламалар 40 мең сумнан башлана. Анапада 18 көн ял итү 66 500 сумга төшә. Анда ике көн поездда барырга туры киләчәк. Юлламаны безгә шалтыратып алырга мөмкин. Сменалар 1 июньнән башлана, санаулы урыннар гына калып бара.
“Байтик” сәламәтләндерү, белем бирү комплексы (baytik-kazan.ru):
— Бездә робототехника, телләрне өйрәнү, ай-ти технологияләр, мультипликация, спорт, туризм, архитектура, дизайн һәм башка күп юнәлештәге сменалар эшли. Чатырлы лагерьда да ял итәргә була. Юллама бәяләре 18 мең сумнан башлана. Балаларны биш тапкыр ашату каралган. Барлык шартлар да тудырылган. Һәр көн күңелле уза. Юллама алу тәртибе рәсми сайтыбызда күрсәтелгән. Гадәттә, яз көне үк урыннарны броньлап куялар.
Гөлназ ГАТИНА, “Сәләтле җәй” үзәге координаторы (selet.biz):
— Беренче смена 27 майдан башлана. 1-2-3 нче сменалар инде тулы, гаризалар кабул итүне туктаттык. 14 июльдән соңгы сменаларга да берән-сәрән генә урыннар калды. Барлыгы 6 мең гариза кабул ителде. Аларның 2700 ен генә сайлап алачакбыз. Бездә барлыгы 27 профиль сменасы исәпләнә. Сәләт аланнары Азнакай, Саба, Лаеш, Кама Тамагы, Алексеевск районы (Биләр), Башкортстанның Туймазы районында, Чувашстанның Батыр районында, Кырымда урнашканнар. “Сәләт” оештырган форумнарда катнашу бушлай. Ә сменаларда ял итү түләүле. Татарстанның Мәгариф һәм фән министрлыгы белән берлектә, укуда, иҗатта, спортта уңышларга ирешкән балалар өчен бушлай ял итү мөмкинлеге булдырдык. Сәләттә ял итәргә теләгән балалар барлык эш нәтиҗәләре күрсәткән портфолио тапшыра. Лагерьга юллама бәясе — 7 көнгә 18 мең сум тирәсе. 18 көнлекләре 36 мең сумнан башлана. Дөрес, район җирендә арзанрак. 5 мең сум. Тик районнардагы аланнарда күбесенчә шул җирлек балалары ял итә. Быел чараларның күбесе “Сәләт” оешмасының 30 еллык юбилее белән бәйле булачак. Ел да яңа аланнар барлыкка килә. Бу юлы “Сәләт Адымнар” (“Адымнар” мәктәпләрендә “Сәләт” классларында укучы балалар өчен), “Алмагач аланы” (“Сәләт”нең үз мәктәбендә шөгыльләнүче сабыйлар өчен) беренче сменаларын ачты. Шулай ук Чувашстанның Батыр районында беренче тапкыр “Сәләт-Илем” аланы эшли башлаячак. “Илем”, чувашчадан тәрҗемә иткәндә, “матур” дигәнне аңлата. Биредә чуваш теленә, мәдәниятенә дә өйрәтәчәкләр. Бездә 7-18 яшькә кадәр балалар һәм үсмерләр ял итә ала.
Эльвира МОЗАФФАРОВА әзерләде.
