Иң күп яңа спектакльләр тәкъдим итә торган театрларның берсе — ул Кәрим Тинчурин исемендәге Татар дәүләт драма һәм комедия театры. «Бәхет Хакы» (авторы Халисә Мөдәррисова) — быелның алтынчы премьерасы. Әсәрне Әтнә театры режиссеры Рамил Фазлыев куйды.
Бәхетле булыр өчен кемнедер бәхетле итәргә кирәк. Бу җөмлә әсәрдәге төп фикерне ачып бирә. Пьеса гаилә кыйммәтләре хакында. Төп герой Зариф (бу рольне өч кеше башкара: Россиянең атказанган, Татарстанның халык артисты — Зөфәр Харисов; Татарстанның атказанган артисты Илнур Байназаров; Артем Пискунов) карьера, уңыш дип аны хөрмәт итеп торган, яраклашып яшәгән хатынын (Альбина Гашигуллина, Татарстанның халык артисты Резедә Төхфәтуллина), әти назыннан мәхрүм калган улын (Эдуард Никитин) да югалта. Әнисен җирләргә дә кайта алмый, беренче мәхәббәте белән дә аерыла. Яшь хатыны (Зәринә Сафина) да аны башкага алыштыра. Картаймыш көнендә сәламәтлеген, гаиләсен, мәхәббәтен югаткач кына, Зариф үткән тормышы хакында уйлана. Ул хаталарын төзәтергә үзендә көч таба алырмы? Бөтен серләрне ачып бетермим. Бу спектакль (“Бәйге хакы”исеме белән) 13 еллап М.Гафури исемендәге Башкорт драма театрында барды. Анда төп рольне Россиянең халык артисты мәрхүм Фидан Гафаров уйнаган булган. Аның вафатыннан соң әсәр сәхнәдән төшкән. Аның каравы тамашачы елап, яратып карый торган әлеге спектакльне тинчуринлылар эләктереп алган.
— Дөресен әйтәм, Башкорт театры куйган спектакльне карамадым. Ул әсәрне без үзебезчә куйдык, — ди Тинчурин театры директоры Фәнис Мөсәгыйтов.
Спектакль җыр-бию белән үрелеп бара. Әсәр өчен махсус 13 яңа җыр язылган. Хореограф Ләйсән Вәлиәхмәтованың тырышлыгын да искәртергә кирәк. Артистларның пластикасы, биюләре сокланырлык. Сүзсез дә кичерешләрне әйтеп бирәләр. Бу әсәр озак вакыт сәхнәдән төшмәс, тамашачыны уйландырыр, һәркемгә үз бәхетен үзенчә аңларга ярдәм итәр дип ышаныйк.
Эльвира МОЗАФФАРОВА.
