Ялларда Җиңү проспектындагы паркта йөргәндә, кичке сәгать 10 нар тирәсендә Татарстанның халык артисты, “Казан” бию ансамбленең сәнгать җитәкчесе, биюче Чулпан Закированы очраттым. Очраклы күрешү дип тә булмый инде. Чөнки Чулпан шунда урнашкан “Чулпан” мәдәни үзәгендә хезмәт куя.
— Әле өйгә кайтып кына барыш. Эш аеруча күп вакыт. Сабантуйлар чоры, — ди Чулпан. Бераз сөйләшеп тордык. Көндәлек тормыштагы яңалыкларын сораштым.
Чулпан — Казан кызы. Әтисе Ринат Зиннур улы Закиров озак еллар Бөтендөнья татар конгрессы башкарма комитеты рәисе вазыйфасын башкарды. Әнисе Рузия Мотыйгуллина — Камал театры артисты. Чулпан 6 яшеннән бии. Юридик һәм хореография юнәлешләре буенча югары белем алган. Ире Илнар Әхмәтҗанов — танылган көрәшче, спорт остасы. Ясминә һәм Айшә исемле ике кыз үстерәләр.
— Чулпан, җәйнең беренче ае нинди эшләр белән узып бара?
— Атнага бер көн ялым бар. Анысында да эшләмичә булмый. Чөнки бакча да бар бит әле. Бакча дигәнем — әти-әнинең зур йорты. Әни күп чәчәкле, төрле агачлар үскән бакча ярата. Помидор, кыяр, борыч, кишер, суган… — ял көне шулар белән кайнашып уза. Өлгерсәк, мунча керәбез.
Сабан туена зур әзерлек бара. Ансамбль Якутиягә федераль Сабантуйга барачак. Казан Сабан туе — иң зур проект. Чөнки ул безнең ансамбльгә йөкләнде һәм анда бөтен республика коллективлары — 800 гә якын артист катнаша. Өр-яңадан әзерләргә кирәк. Сер түгел, сәнгатьтә шәхси тормышны, үз эшләреңне мондый тыгыз вакытта читкәрәк куеп торырга туры килә. Казан шәһәр филармониясендә киләсе сезонга әзерләнәбез. Хәзер ике спектакль өстендә эшлибез.
Ел азагында “Казан” бию ансамбле каршында эшләп килүче балалар студиясе чыгарылыш концертларын әзерли. Шәһәр буенча 800 гә якын балабыз бар. Шуларның ел нәтиҗәләрен барларга кирәк, имтихан, ачык дәресләр, ата-аналар белән аралашу… Аларга атап өч концерт эшләнә.
— Өйдә хәлләр ничек?
— Вакыт тыгыз дисәм дә, өйдә дә пыр туздырабыз (көлә). Эш белән генә чикләнеп булмый. Фатирда тулы куәтенә ремонт бара. Мин бөтен нәрсәгә глобаль яктан тотынам. Стеналарга хәтле күчерәм. Әлеге дә баягы, эш тыгыз булгач, артык җәелергә кул гына җитеп бетми. Тормыш иптәшем Илнар бик тырыша. Ул бөтен эшне үз өстенә алды. Мин шунда матур гына, тәтиләп кенә торам инде. Обойлар, җиһаз сайлыйм.
— Балалар зурдыр инде?
— Кызлар үсә. Олысы Ясминә IX сыйныфны тәмамлады. Аның чыгарылыш имтиханнары. XI сыйныфка мәктәптә кала. Ул башта нәфис гимнастикага йөрде, 8 яшьтән биеде. Барабанда һәм гитарада уйный. Инглиз телен бик әйбәт белә, җиңел сөйләшә, фильмнарны тәрҗемәсез карый, чит ил классикасын бик ярата. “Адымнар” мәктәбендә укый. Аишәбез V сыйныфны тәмамлады. Җырлап йөрде дә хәзер биюдә. Ул да быел “Адымнар”га күчә. Үземә: “Ике балабыз да мәктәпне тәмамлаганда, инглиз телен тулысынча белергә тиеш”, — дип максат куйдым. Үзем дә шактый вакыт чит телләр өйрәндем. Гомумән, күп укыган кешене хөрмәт итәм.
— Кем булырга хыялланалар?
— Кечкенәсе, артистлыкка барам, дип күп сөйләнә. Драма артисты булу турында хыяллана. Моңа сәләте дә бар. Әни кебек тә, әби кебек тә буласым килә, ди. Олысы күбрәк социология, психология ягына тартылыр, дип уйлыйм. Бәлки, тәрҗемәче булыр.
— Эшеңдә, яңа проектларда уңышлар, Чулпан!
Лилия ЙОСЫПОВА.
