Физалис — грекчадан “куык” дигәнне аңлата. Аның черри помидорына охшаган җимешләре куык (капкач) эчендә. Физалисның декоратив төре дә бар, аның җимеш капкачы бик матур кызгылт сары төстә. Шуңа ул “кытай фонарьлары” исеме алган. Декоратив физалисның җимешләрен ашарга ярамый.
Гүзәлия ГЫЙЛӘҖЕВА: Менделеевск районы Ижевка авылы:
— Яшелчә сортын утыртам, апрельнең 20 сендә чәчәм, үсентесен майда җылыткач, бакчага күчерәм. Болай ашарга да бик тәмле, көзен маринадлыйм.
Мәймүнә МОТАЛЛАПОВА, Балык Бистәсе районы Масловка бистәсе:
— Физалисны ел саен үстерәм. Аны апрель урталары, 20 ләрендә чәчсәң дә өлгерә. Физалисның “Ананасовый”, “Кондитер” дигән сортлары ошый. Кайнатмасын ясыйм, лимон, мандарин яки әфлисун кушам, бик тәмле килеп чыга.
Көзен җимешләрен җыеп бетерергә кирәк, югыйсә орлыгы коелып, бакчаны баса.
Дания ШАДАЛИЕВА, Арча районы Яңа Кенәр авылы:
— Яшелчә физалисы безнең климатка күбрәк яраклашкан дип уйлыйм. Тик аның җимешләре баллы түгел. Суыкка бирешми, бер чәчсәң, ел саен тишелеп чыга. Физалис бик җәелеп үсә, аңа иркен урын кирәк. Җиләкле физалисны (земляничный) март ахырында чәчеп, кыраулар куркынычы беткәч, бакчага күчерергә кирәк. Физалис яктылыкны ярата, күләгәдә җимешләре өлгерми. Үстерү өчен әллә ни кирәкми, вакытында су сибү, җәйгә ике тапкыр үлән әчеткесе (мин кычыткан әчетәм) сибү җитә. Җимешләре коела башлау — өлгерү билгесе. Өлгермичә җыелганнары да өйдә акрынлап җитешә.
Физалистан кайнатма әзерлим, бик тәмле була. 1 кг физалиска 1 кг шикәр комы кушам, 1 әфлисунны турап салам. Кагы да бик тәмле.
Физалис җимешләрен торт бизәү өчен дә кулланырга була.
