Әтнә районы Кышлау авылында мәчет янында матур итеп эшләнгән кое бар. Тирәсен агачтан ясалган декоратив тегермәннәр бизәп тора, брусчатка җәелгән, койма белән тотып алганнар. Әмма чынбарлыкта ул кое түгел, ә суы торбалар белән бирегә китерелгән “Гыйбади” чишмәсе. Аны шулай кое формасында эшләргә уйлаганнар. Кизләүнең, урынына бәйле, исеме дә үзгәргән — хәзер ул халык телендә “Мәчет” чишмәсе дип йөртелә.
— “Гыйбади” чишмәсе суын мәчет янына китерү эше 2020 елда башкарылды. Ул урамның аскы өлешендә, бакча башында ага иде, 250-300 м ераклыкта, су буенда урнашкан. Колхоз чорында биредә сөт саклаганнар. Бик көчле ага, электән 1 секундка 1 литр су тула, дип әйтәләр иде. Бурадан эшләнгән, 2016-2017 елларда башта аны ремонтладык, — ди Кышлау авыл җирлегенең элекке башлыгы Рәхинә Шакирова. — Ремонт барышында авыл җирлегенең керем акчасын да, үзара салымнан да файдаландык. Суы тәмле. Әмма анда җәен генә йөреп була иде. Авыл картая, су буена төшеп алырга ерак, уңайлы түгел. Шуңа хыялда әлеге кизләү суын урамга китерү теләге күптән бар иде. Бу хакта авыл халкы белән дә сөйләштек һәм мәчет ишегалдына менгезергә булдык. Үзара салым һәм авыл җирлеге акчасын тоттык. Декоратив итеп эшләтүдә “Таң” җәмгыяте зур булышлык күрсәтте. Экскаватор белән казып, торба суздык. Кое формасында эшләтеп, суны шуннан төймәгә басып агызыла торган итеп ясаттык. Су буеннан менгезгәндә, мәчет күршесендә яшәүче Фәрит Мөхәммәтгалиев ишегалды аша трактор белән казытып үткәрдек. Ул лапасын сүтте хәтта. Суы катмасын, ул-бу булмасын дип, чишмәне Фәрит гел үзе карап тора.
Курка-курка гына тотынган идек. Уңышлы ерып чыктык. Хәзер кизләү авылны бизәп тора. Халыкка да җайлы, көн саен суга киләләр. Күрше авылларга, шәһәрләргә дә алып китәләр. Су буйларында чишмәләр матур эшләнә. Әмма алар уңайлы түгел. Матурлык өчен ясала һәм җәйге чорда гына кулланырга мөмкин. Кизләүләрнең халыкка якын, юл өстендә булуы рәхәт шул. Андый чакта игътибар күбрәк тия, гел күз уңында була, кешеләр барлап тора.
Лилия ЙОСЫПОВА.
