Башкортстанның Иглин районы Үктәй авылында яшәүче ирле-хатынлы Илизә һәм Рөстәм Фәттаховлар быел 200 мең лалә үстергән. 8 март бәйрәмендә генә түгел, лаләләрне майда алучылар да күп икән. Аларның чәчәкләр теплицасына фотосессиягә дә еш киләләр.
Белгечлеге буенча Илизә нефтьче, ике техник югары белеме бар. Бакчачылыкка катнашы булмаса да, балачактан чәчәкләр үстерергә хыялланган. Ире аның бу фикерен хуплаган. Һәм гаилә 7 ел элек теләкләрен тормышка ашырырга алынган. Башта 1000 төп лалә чәчәге утыртканнар. Җиде ел эчендә үсентеләр саны 200 меңнән артып киткән. Нинди генә төсләре юк, 31 төрдән артык лалә. Моннан тыш алар хризантема да үстерә. Уфадагы кибетләрендә йорт гөлләре дә саталар.
— Беренче чиратта күңел өчен эшлибез. Кайберәүләр чәчәк сатып, күп акча эшләп була дип уйлыйдыр. Әмма чыгымы зур. Хәзер газга, утка бәяләр артты. Суганчаларны Голландиядән кайтартабыз. Юл чыгымы суганчаның үзенә караганда да кыйммәтрәк. Эшчеләргә дә түләргә кирәк. Көтелмәгән чыгымнар була. Былтыр суыкта җылылык котелы шартлады. Бөтен теплицаны су басты. Быел суганчаларның күбесе брак булып чыкты, бөҗәкләр белән зарарланганнар иде, — ди Илизә.
Алар башкаларны да чәчәк үстерү серләренә өйрәтергә тели. “Эш буенча китәргә туры килгәндә, лаләләрне ышанып калдырырлык хезмәткәрләр булу мөһим. Берсендә без кайтканчы кайбер үсентеләр үлгән иде”, — диләр. Илизәнең үзенең дә иң яраткан чәчәге — лалә.
— Лалә салкынны, шул ук вакытта җылы караш, игътибарны ярата. Көндез, төнлә теплицада 14 оС җылылык, 65-70 % дымлылык саклана. Лаләләрне чәчәк атканчы кисеп алабыз. Күбесенчә якын-тирә районнардан күпләп сатып алалар. Бер чәчәк 80 сум тора, күпләп алганда 34 сумнан башлана. Былтыр бер кыз 50 мең лалә сатып алган иде, — дип искә ала әңгәмәдәшем. Киләсе елга Фәттаховлар чәчәкләрне 350 мең төпкә җиткерергә ниятли.
Эльвира МОЗАФФАРОВА.
