ВИНОГРАДНЫ КЫШКА ӘЗЕРЛИБЕЗ

Авыл хуҗалыгы фәннәре кандидаты, ТРның атказанган авыл хуҗалыгы хезмәткәре Франс ХӘЛИЛОВ:
— Каплар алдыннан виноградка 3 %лы бакыр купоросы сиптерәм. Бу куакларны пешегү, ягъни гөмбәле авырулардан саклый. Купорос белән эшкәртелгән ботакларга кимерүчеләр тими. Соңгы берничә елда виноградны чыршы ботаклары белән каплыйм. Виноград астына 3-5 см калынлыкта чыршы ботаклары җәям, аның өстенә виноград ботаклары салып, тимерчыбык белән эләктереп куям. Ботаклар өстенә тагын чыршы ботаклары салам. Өстенә бакыр купоросы сиптереп, пленка каплыйм. Һава керсен өчен очларын ачык калдырам. Виноград шулай кар астында кышлый.
Болай каплауның берничә уңай ягы бар. Беренчедән, ылыс арасына тычкан керми. Икенчедән, виноград җилләп тора. Бу — безнең климат шартларында виноградны кышлату өчен үзем сынаган һәм зур чыгымнар сорамый торган ысул. Мәсәлән, кышлар бик кырыс килгәндә, -30 оСка кадәр суыклар күзәтелгәндә, гадәти җиләк-җимеш агачлары зыян күргәндә дә, болай капланган виноград яхшы кышлады.
Виноградның начар кышлавына күп вакыт артык калын төрү һәм иртә каплау сәбәпче: ботаклар күгәрә, пешегә. Икенче сәбәп: кышка артык озын һәм өлгереп җитмәгән ботаклар калдыру.
Берничә ел элек сынау максатында, “Загадка Шарова” сортлы виноградның өч ботагын шпаллердан бөтенләй төшермәдем. Бу сорт мин сынаганнар арасында кышка иң чыдамы. Аның кар капламаган ботаклары өшеде, ә кар астында калганнары, башкача капланмаган килеш тә исән чыкты. Димәк, Урта полосада бу сортны да кышка капларга кирәк.