Бакопа — иң яраткан берьеллык чәчәкләремнең берсе. Нигә берьеллык кына? Чөнки ул безнең кышларны чыга алмый. Шуңа аны көзен өйгә алып керергә һәм язга кадәр чыбыкчадан үрчетеп сакларга туры килә. Дөрес тәрбияләсәгез, ул иртә яздан көзге кырауларга хәтле сезне шатландырып чәчәк атып утыра ала.
Бакопаның вегетатив һәм орлыктан үрчи торган төрләре бар, мин икесен дә үстерәм. Төсләре дә төрле: ак, алсу, шәмәхә, зәңгәр, миләүшә төслеләре бар. Ампель петуния кебек үсә, бер кашпога бер үсенте җитә. Бакопаны кисәргә курыкмагыз. Үскән саен кисеп, формалаштырып торырга кирәк, шул чакта ул тармаклана, тагын да матурлана, шарсыман үсәчәк. Тиз үсә торган үсемлек буларак, бакопаны даими тукландырырга кирәк. Ике атнага бер минераль ашлама кертегез яки утыртканда ук туфрагына озак вакытка җитә торган ашлама кушыгыз. Суны дөрес сибегез, ул күп сибүне дә, дым җитмәүне дә яратмый. Төбенә су җыелмаска тиеш.
Көз азагында өйгә алып кердем һәм шундук үрчетә башладым. Бакопа кышын начар тамырлана дип уйлыйлар. Минекеләр белән мондый проблема юк, тамырланалар, үсәләр. Лампа астында тотам.
Зилә ИДРИСОВА, Башкортстан, Кушнаренко районы Иске Кормаш авылы.
