Сливаның кәүсәсен куяннар ашаган. Хәзер кояш нурында пешмәсен өчен нәрсә эшләп була?
Р.ВӘЛИЕВ.
Танылган бакчачы Франс ХӘЛИЛОВ:
— Әгәр куяннар сливаның кәүсәсен тирәли кимергән булса, тоташтырырлык кайрысы бөтенләй калмаса, “күперчек” (“мостик) ысулы белән ялгарга туры киләчәк. Чөнки кәүсәгә туклану кайры буйлап килә. Моның өчен бөреләр бүрткәнче чыбыкчалар әзерләргә кирәк. Аларны ялгаганчы шул хәлдә саклыйлар. Чыбыкчалар кәүсәдәге зарарланган урыннан 8-12 см га озынрак булырга тиеш. Ялгауны апрель азагы һәм майда, сок хәрәкәте башлангач һәм кайры үзагачтан яхшы куба башлагач ясыйлар. 2,5-3 см калынлыктагы кәүсә өчен каршы якларга ике чыбыкча “күперчек” кую җитә. Юанрак кәүсәле зур агачны коткару өчен 6-8 чыбыкча кирәк булачак. Моны эшли алмасагыз, агач корыячак.
Әгәр кайры бер яктан, 2-3 см киңлектә генә булса да зарарланмыйча калса, кайрының кимерелгән кырыйларын үткен пычак белән тигезләп кисәргә кирәк. Аннан 50:50 исәбеннән кызыл балчык һәм яңа сыер тизәген кушып, каймак куелыгындагы катнашма ясарга. Зарарланган урынга аны сылап, капчык белән тыгызлап бәйләп куярга кирәк.
