Мамадышта гомер кичерүче 45 яшьлек Роберт Сәлахетдинов кардан төрле фигуралар ясап, халыкны сөендерде. Ул сыннарны зәвык белән эшли. Тик оста белән сөйләшергә җай чыкмады. Шуңа да әлеге эшнең нечкәлекләрен хатыны Ләйсән ападан сораштым.
— Мамадышта ирем үз куллары белән төзегән йортта яшибез, — дип сүз башлады Ләйсән апа. — Баскычларын, декоратив штукатуркасын үзе ясады. Өй тирәсен Робертның рәсемнәре бизи. Кар сыннарын ирем 25 ел элек ясый башлаган иде. Сыннарны, катлаулылыгына карап, көненә 15-20 не дә эшләгәне бар. Мамадышның Совет урамын, шәһәр мәктәпләрен, төрле кибетләрне бизәде. Ел саен 66 яшьлек әнисе Флюраның өен бизи. Роберт, нинди ел килүеннән чыгып, композицияне әзерли. Яздан нинди фигуралар ясаячагын уйлап йөри башлый. Иң әүвәл ул аны күз алдына китерә, соңрак рәсемгә төшерә. Иремнең эшләрен бик яраталар, соклануларын яшермиләр, истәлеккә фотога төшәләр. Бер белмәгән кешеләр туктап, кат-кат рәхмәт әйтә.
— Роберт абый җәен нәрсә белән шөгыльләнә?
— Җәен йортлар төзи, түбәләр яба. Төрле биналарга проектлар сыза, картиналар ясый, агачтан эшләгән фигуралары да бик матур килеп чыга. Быел икебезгә 500 литр җиләк җыйдык.
Сәлахетдиновлар пар алма кебек ике кыз үстерә. Олы кызлары Сөмбел XI сыйныфта белем ала. “Тархан” мәдәни-тарихый телевизион конкурсында катнашып, финалга барып җиткән. Бу җиңү Сөмбелгә КФУга бюджет бүлегенә укырга керергә мөмкинлек бирәчәк. Төпчек кызлары Ландыш VII сыйныфта. Сәнгать мәктәбен кызыл дипломга тәмамлаган, спорт белән шөгыльләнә. Ләйсән апа Мамадыш районы үзәк хастаханәсендә буфетта эшли. Тирә-юнебездә Сәлахетдиновлар кебек уңган гаиләләр күбрәк булсын иде.
Арыслан ГӘРӘЕВ.
