Алып баручы Иван ОСТРОУМОВ күпләргә “ТНВ” телеканалындагы төрле тапшырулар аша таныш. Аны еш кына рәсми чараларда эшләргә дә чакыралар. Ул балачактан шушы өлкәдә кайный. Күптән түгел “Татарстанның атказанган мәдәният хезмәткәре” исеме бирелде.
— Үскәч кем булырмын дип, хыялланырга да өлгермәдем, һөнәрем мине үзе сайлады, — ди Иван. — Балалар бакчасыннан башлап, һәрчак бәйрәмнәр үзәгендә идем. Казандагы 2 нче татар гимназиясен тәмамлап, КФУның Филология һәм мәдәниятара багланышлар институтына кердем. Студент чакларында да гел сәхнәдә идем.
“ГЕЛ “МИТРОФАН” БЕЛӘН ЙӨРДЕМ”
— Иван, син — Казан егете. Тамырларың кайсы яклар белән бәйле?
— Казанда туып-үстем. Әнием Гөлсинә — Актаныш кызы. Әтием Владимир — Мамадыш якларыннан. Балачагымны әллә ни хәтерләмим. Әмма шунысы бик яхшы исемдә: кулымда гел микрофон йә шуңа охшаган графин капкачы булыр иде. Аны һәрчак “митрофан” дип атый идем.
— Телевидение эшчәнлегең кайчан башланды?
— “Татарстан-Яңа гасыр” каналына 2006 елда килеп кердем. Мине шигырь укучы итеп чакырдылар. Соңыннан балалар һәм яшүсмерләр өчен “Тамчы” тапшыруын алып бардым. Беренче съемка көне алдыннан сыйныфташым белән сугыштым, күз тирәсендә “фингал” чыкты. Ярый әле гримерлар бар (көлешәбез). Аннары “Яшь ТНВ”, ә 2018 елдан “Шаян ТВ” каналы алып баручыларының берсе булып эшлим. 6 ел дәвамында “ТНВ”да иртәнге “Здравствуйте!” тапшыруын алып барам.
“21 ЕЛ СӘХНӘДӘ”
— Син күп кенә дәрәҗәле хөкүмәт чараларын да алып барасың. Зур кунаклар, түрәләр каршында чыгыш ясау каушатамы?
— Сәхнәдә, әйткәнемчә, балачактан. 9 яшемнән бирле төрле чаралар алып барырга туры килде. 21 ел сәхнәдә! Әмма бүген дә сәхнәгә чыккан саен каушыйм. Каушамаган кеше профессионал түгел, ди кайберәүләр. Бәлки, шулайдыр. Залда гади халык булсынмы, зур кунаклармы, минем өчен, беренче чиратта, алар — чараны карарга килгән тамашачылар. Син залдагы һәр кешегә күз карашың белән булса да игътибар итәргә тиеш. Үз эшемне, сәхнәне бик яратам, ул да мине ярата.
— Алып баручы партнерлардан кемнәрне үзең өчен бик җайлы дип атар идең?
— Минем өчен җайлылары — ярты сүздән аңлап, теманы дәвам итәргә сәләтле булган алып баручылар. Андыйлар, кызганыч, күп түгел. Гөлназ Сәфәрова, Раяна Әхмәтҗанова, Марина Михайлова, Айзилә Батырханованы аерып әйтер идем. Алар белән партнерлыкта эшләү бик рәхәт.
“БИК САГЫНАБЫЗ…”
— Иван, былтыр тормышыңда куанычлы вакыйгалар да, зур югалтулар да булды… Башта гаилә коруың турында сөйләшик әле.
— 2024 елда Халыкара гаилә көнендә тормыш иптәшем белән язылыштык. Ксения — Казан кызы, баскетбол буенча спорт остасы. Карьерасын тәмамлап, бүген телекоммуникация өлкәсендә эшли.
— Тормышыңда иң зур югалту — әниең китеп барды…
— Үткән ел әниебезне югалттык. Бу хакта бик сөйләргә яратмыйм. Күз яшьләрем тәгәри башлый. Әлеге хәбәрне бик авыр кабул иттем. Әни — бөтен тормышны гаиләгә багышлаган кеше. Апамны (ул 16 яшькә олырак) һәм мине яхшы, тәртипле балалар итеп үстерде. Бик сагынабыз. Соңгы елда әбиебезне (әтинең әнисен) дә югалттык.
— Әтиең белән аралашып яшисезме?
— Әти белән элемтә хәзер тыгыз. Элек күп еллар дәвамында аралашмадык. Бүген бик якын без.
— Буш вакытларда нинди ял яратасың? Кайларга йөрисез?
— Буш вакытым аз. Халык ял иткәндә, артистлар, журналистлар гел эштә. Чит шәһәрләргә китеп, эш буенча җавап бирмичә ял итәргә яратам. Кызганыч, чит илләргә озакка барып кайтырга вакыт сирәк эләгә.
— Китап укырга яратасыңмы?
— Чынлап әйткәндә, китап фанаты түгел мин. Шулай да, үземне кулга алып, күптән түгел Чарльз Диккенсның кайбер әсәрләрен укып чыктым әле. Күбрәк кино, аеруча комедияләр карарга яратам.
— Телевизор караучыларга һәм газета укучыларга теләкләреңне дә җиткерсәң иде.
— Теләгем күп еллар дәвамында үзгәрми: алдагы көнегез үткәненнән яхшырак булсын!
Лилия ЙОСЫПОВА.
